‘मदिराको हरेक चुस्कीले क्यान्सरको जोखिम बढाउन सक्छ, अमेरिकी सर्जन जनरलले दिए ठूलो चेतावनी’

अमेरिकी सर्जन जनरलले हालै मदिरा सेवन सँग सम्बन्धित स्वास्थ्य खतराहरू बारे महत्त्वपूर्ण चेतावनी जारी गरेका छन् । उनले सुझाव दिएका छन् कि चुरोटको बट्टामा जस्तै मदिराको बोतलमा पनि क्यान्सरको चेतावनी स्पष्ट रूपमा उल्लेख गर्नु पर्नेछ । यो चेतावनी विश्व भर बढ्दै गएका क्यान्सरका घटनाहरू र मदिरा सेवनको बीचको सीधा सम्बन्धलाई उजागर गर्नका लागि हो ।

अनुसन्धानले के भन्छ?

अनुसन्धान कर्ता हरूका अनुसार, मदिरामा पाइने एथनोल शरीर भित्र गएर एसिटाल्डिहाइडमा परिवर्तन हुन्छ । यो रसायनले डीएनएलाई क्षति पुर्याउन सक्छ र क्यान्सरको विकासलाई प्रोत्साहित गर्न सक्छ । साथै, मदिराले शरीरको कोषहरूलाई पुनः निर्माण गर्ने क्षमता पनि कमजोर बनाउँछ ।

मदिराबाट बढ्ने क्यान्सरका प्रकारहरू

• मुख, घाटी र कलेजोको क्यान्सर ।
• महिलाहरूमा विशेष गरी स्तन क्यान्सर ।
• कोलन (ठूला आन्द्राको  शुरू र मलाशय सम्मका भाग) र रेक्टल क्यान्सर ।

अमेरिकी क्यान्सर सोसाइटीका अनुसार, नियमित रूपमा मदिरा सेवन गर्ने व्यक्तिहरूमा यी क्यान्सरको जोखिम धेरै गुणा बढ्ने सम्भावना हुन्छ ।

प्रत्येक घुट्को असर

विशेषज्ञहरूको भनाइ छ, कम मात्रामा होस वा धेरै, मदिराको प्रत्येक घुट्ले शरीरमा नकारात्मक असर पार्छ । ‘मध्यम मदिरा सेवन’ सुरक्षित छ भन्ने सोच्नेहरूले थाहा पाउनु पर्छ कि प्रत्येक घुट्ले डीएनएमा असर पारिरहेको हुन्छ ।

सर्जन जनरलको आग्रह

सर्जन जनरलले मदिरा उत्पादकहरूलाई आफ्नो उत्पादनमा स्पष्ट स्वास्थ्य चेतावनी दिने अपिल गरेका छन् । उनी भन्छन् कि यदि मानिसहरूले मदिरा क्यान्सरको कारण हुन सक्छ भन्ने कुरा थाहा पाए, भने उनीहरू यसको सेवन घटाउन सक्छन् ।

जागरूकता आवश्यक

नेपाल जस्ता देशहरूमा पनि मदिराको खपत तीव्र रूपमा बढि रहेको छ । यो अवस्था नियन्त्रण गर्न सरकारले र स्वास्थ्य संस्थाहरूले जन चेतना फैलाउनुपर्छ । क्यान्सरका बढ्दो घटनालाई ध्यानमा राख्दै, मदिराको बोतलमा चेतावनी दिने कदम प्रभावकारी हुन सक्छ ।