औषधि व्यवस्था विभागद्वारा भ्रमात्मक विज्ञापन विरुद्ध चेतावनी जारी

काठमाडौं – औषधि व्यवस्था विभागले सामाजिक सञ्जालका फेसबुक, टिकटक लगायतका माध्यम मार्फत भ्रामक विज्ञापनको माध्यमबाट अनियन्त्रित रूपमा विक्री भइरहेको औषधि जन्य सामग्रीहरू बारे चेतावनी जारी गरेको छ।

विभागका अनुसार मधुमेह, मोटोपन, प्रोस्टेट, युरिक एसिड, थाइराइड, यौनशक्ति वृद्धि, क्यान्सर लगायतका रोग निको पार्ने दाबी गर्दै विभिन्न औषधिजन्य उत्पादनहरू प्रचार तथा विक्री भइरहेको पाइएको छ। तर ती उत्पादनहरू विभागमा दर्ता नगरिएका साथै तिनको कुनै वैज्ञानिक प्रमाण समेत नरहेको जनाइएको छ।

विभागका विज्ञहरूका अनुसार प्रयोगशालागत परीक्षणमा यस्ता औषधिहरूले गम्भीर स्वास्थ्य समस्या निम्त्याउने प्रमाण फेला परेको छ। उदाहरणका लागि, गार्सिनिया कम्बोजिया नामक पदार्थको अत्यधिक प्रयोगले लिड पोइजनिङ (सिसाको विषाक्तता), गम्भीर पेट दुखाइ, कब्जियत जस्ता स्वास्थ्य समस्या उत्पन्न गर्ने देखिएको छ।

यस्तै, यौनशक्ति वृद्धि गर्ने नाममा विक्री गरिएका कतिपय उत्पादनहरूमा सिल्डनाफिल नामक औषधिको मिश्रण पाइए पछि विभागले गम्भीर चासो व्यक्त गरेको छ। अत्यधिक मात्रामा सेवन गर्दा यसले मानव स्वास्थ्यमा नकारात्मक असर पार्न सक्नुका साथै ज्यान समेत लिन सक्ने बताइएको छ।

विभागले औषधि ऐन, २०३५ विपरीतका गतिविधि नगर्न/नगराउन सबै सरोकारवालाहरूलाई आग्रह गर्दै सर्वसाधारणलाई यस्ता भ्रमात्मक प्रचारमा नपर्न चेतावनी दिएको छ। अनधिकृत औषधिहरूको विक्री तथा वितरणमा संलग्नहरूलाई कानुनी कारबाही गरिने विभागले स्पष्ट पारेको छ।