वायु प्रदूषण संकट: जनस्वास्थ्य जोखिममा, सतर्कता अपनाउन आग्रह
काठमाडौं – हाल काठमाडौँ उपत्यका लगायत देशभर का प्रमुख सहरहरूमा वायु प्रदूषणको स्तर अत्यन्तै खतरनाक बिन्दुमा पुगेको छ।
राष्ट्रिय विपद् जोखिम न्युनीकरण तथा व्यवस्थापन प्राधिकरण र नेपाल चिकित्सक संघले वायु प्रदूषणका कारण उत्पन्न हुन सक्ने स्वास्थ्य जोखिम बारे सतर्कता अपनाउन आग्रह गरेका छन्।
हालको मौसम, बढ्दो वन डढेलो, सडक तथा अन्य निर्माण कार्यबाट उत्पन्न हुने धुलो, सवारी साधनको प्रदूषण, फोहर जलाउने जस्ता क्रियाकलापले वायु प्रदूषणलाई भयावह बनाएको छ।
वायु गुणस्तर सूचकाङ्क (एक्यूआई) अस्वास्थ्यकर स्तरमा पुग्दा बालबालिका, वृद्ध वृद्धा तथा दीर्घ रोगीहरूमा गम्भीर असर पर्ने खतरा बढेको छ।
वायु प्रदूषणका कारण मानिसहरूमा श्वास प्रश्वासमा समस्या, दम तथा फोक्सोको सङ्क्रमण, घाँटी चिलाउने, आँखा पोल्ने, छाला सुख्खा हुने, एलर्जी, टाउको दुख्ने र थकान जस्ता लक्षणहरू देखिएको चिकित्सकहरूले बताएका छन्। दीर्घकालीन रूपमा यसले गम्भीर स्वास्थ्य समस्याहरू निम्त्याउने हुँदा विशेष सावधानी अपनाउन अनुरोध गरिएको छ।
वायु प्रदूषण विज्ञहरूका अनुसार अझै एक साता सम्म वायु प्रदूषणमा सुधार नहुने देखिएकोले, सरकारी निकाय, निजी क्षेत्र तथा नागरिक समाज सबैले वातावरण संरक्षणमा ध्यान दिनुपर्ने प्राधिकरणले जनाएको छ।
सम्बन्धित निकायहरूलाई प्रभावकारी नीति तथा कार्यान्वयन गर्न आग्रह गर्दै, नेपाल चिकित्सक संघले जनस्वास्थ्य सुरक्षाका लागि तत्काल आवश्यक कदम चाल्न अपिल गरेको छ।
सावधानीका उपायहरू
राष्ट्रिय विपद् जोखिम न्युनीकरण तथा व्यवस्थापन प्राधिकरण र नेपाल चिकित्सक संघले निम्न सावधानी अपनाउन अनुरोध गरेका छन ।
- अत्यावश्यक नभए सम्म घरमै बस्ने
- कार्यस्थलमा भौतिक उपस्थितिको आवश्यकता नभए घरबाटै काम गर्ने
- सवारी साधनको प्रयोग यथा सम्भव कम गर्ने
- घर, सडक तथा सार्वजनिक स्थानहरूको सरसफाइमा ध्यान दिने
- अत्यधिक धुलो र धुवाँ उत्सर्जन गर्ने निर्माण कार्य केही समयका लागि स्थगित गर्ने
- फोहर जलाउने कार्य नगर्ने र उचित व्यवस्थापन गर्ने
- वन डढेलो हुन नदिन र लागिहाले तत्काल नियन्त्रण गर्ने
- बालबालिका, वृद्धवृद्धा र संवेदनशील स्वास्थ्य अवस्थाका व्यक्तिहरूको विशेष हेरचाह गर्ने
- घर बाहिर निस्कँदा सुरक्षित मास्कको अनिवार्य प्रयोग गर्ने।
प्रतिक्रिया दिनुहोस