पत्रकार सुरेश रजकको जलेरै मृत्यु भएको पुष्टि, शरीरमा गोली देखिएन

काठमाडौं – काठमाडौंको तीनकुनेमा भएको राजावादी प्रदर्शनमा आगजनीमा परेर मृत्यु भएका पत्रकार सुरेश रजकको जलेर मृत्यु भएको पुष्टि भएको छ।

३३ वर्षीय रजकको शरीरमा कुनै पनि गोली देखिएको छैन भने जिउँदै रहँदा शरीरमा लागेको आगोले डडेर मृत्यु भएको पोस्टमार्टम प्रतिवेदनले पुष्टि भएको हो ।

त्रिवि शिक्षण अस्पतालको फोरेन्सिक विभागका प्रमुख डा. गोपाल चौधरी ले नेपालहेल्थप्रेस संग भने – ‘पोस्टमार्टमले आगो लाग्दा सम्म जीवित नै रहेका रजक को आगोले डढेर मृत्यु भएको देखाएको छ।’

रजकको पोस्टमार्टम प्रतिवेदनमा भनिएको छ, ‘ब्ल्याक सुट पार्टिकल्स इन ट्राकिया एण्ड लंग्स’, अर्थात् ‘स्वासनली र फोक्सोमा कालो धुलोका कणहरू’, देखिएको उल्लेख छ ।

पोस्टमार्टम गर्नु भन्दा अगाडी मृत शरीरको एक्सरे समेत गरिएको थियो। एक्सरे प्रतिवेदनमा शरीरको कुनै पनि भागमा गोली देखिएको थिएन।

‘शरीरबाट गोली भेटिएन’, डाक्टर चौधरीले पोस्टमार्टम प्रतिवेदनलाई औल्याउँदै भने – ‘उनको मृत्यु डढेरै भएको हो। उनलाई मारेर जलाइएको होइन । मृत्युको कारण धुवा र आगोको संयोजन अर्थात् मेल हो।’

राजावादी आन्दोलनको क्रममा गत चैत १५ गते काठमाडौंको तीनकुनेमा रहेको एक भवन को चौथो तलाबाट विरोध प्रदर्शनलाई टेलिभिजनका लागि क्यामेरामा दृश्य कैद गरिरहेका  सुरेश रजकको रिपोर्टिङ गर्ने क्रममा प्रदर्शनकारीहरू द्वारा भवनमा लगाइएको आगोले डढेर मृत्यु भएको थियो ।