‘डा.अनिल विक्रम कार्की सिएमएएओ को अध्यक्षमा निर्वाचित’

काठमाडौं– कन्फेडरेसन अफ मेडिकल एसोसिएसन इन एसिया एण्ड ओसियानिया (सिएमएएओ) को सन २०२५–२०२६ को अध्यक्ष पदको डा.अनिल विक्रम कार्की निर्वाचित भएका छन् ।

यो संगै सिएमएएओ अर्थात एसिया र ओशियानियाका मेडिकल एसोसिएसनको परिसङ्घको ३९ औं साधारण सभा सन २०२५ मा पहिलो पटक नेपाल मा हुने भएको छ ।

फिलिपिन्समा २४ अगस्ट देखी शुरु भएको तिन दिने कन्फेडरेसनको ३८ औं साधारण सभा र ५९ औं परिषद् बैठकले नेपाल मेडिकल एसोसिएसन का अध्यक्ष डा.कार्की लाई सर्व सम्मत द्वारा अध्यक्षमा निर्वाचित गरेको हो ।

डा.कार्की सन २०२५ देखि सन २०२६ सम्म एक वर्षको लागि १२ वटा मेडिकल एसोसिएसन आवद्घ भएको परिसङ्घको अध्यक्षको कार्यभार सम्हाल्ने छन् ।

फिलिपिन्समा भएको ३८ औं साधारण सभामा नेपाल मेडिकल एसोसिएसनका अध्यक्ष डा.कार्की र महासचिव डा. संजीव तिवारीले कार्य पत्र समेत प्रस्तुत गरेका थिए ।

परिसङ्घमा अस्ट्रेलिया, हङ्गकङ्ग, इन्डोनेसिया, जापान, कोरिया, मलेसिया, म्यानमार, फिलिपिन्स, सिङ्गापुर, ताइवान, थाइल्याण्ड र नेपालको मेडिकल एसोसिएसन आवद्घ छन ।