स्वास्थ्य राज्यमन्त्री केसीद्वारा स्वास्थ्य बिमा सफल बनाउने रणनीतिक योजना प्रस्तुत

काठमाडौं–स्वास्थ्य तथा जनसंख्या राज्यमन्त्री हीराचन्द्र केसीको अध्यक्षतामा बुधवार स्वास्थ्य बिमा समस्या समाधान कार्यदलको पहिलो बैठक बसेको छ । बैठकमा राज्यमन्त्रीले बिमा कार्यक्रम सफल बनाउन रणनीतिक योजना प्रस्तुत गरेका छन ।

बैठकमा स्वास्थ्य बिमा समस्या समाधानका दीर्घकालीन विभिन्न उपायहरूको बारेमा विस्तृत छलफल समेत भएको थियो । बुधबारको बैठकले आगामी आइतबार पुनः बस्ने निर्णय गरेको छ ।

स्वास्थ्य बिमा आम नागरिकसंग प्रत्यक्ष जोडिएको औँल्याउदै स्वास्थ्य राज्यमन्त्री केसीले हाल देखिएका समस्या समाधान गर्न कार्यदल केन्द्रित हुने बताए ।

केसीले स्वास्थ्य बिमा कार्यक्रमलाई दिगो बनाउन आवश्यक रहेको र कार्यक्रमलाई नागरिकले सक्दो लाभ लिने एवं सेवामा थप गुणस्तरीयता बनाउन आवश्यक रहेको समेत जनाए ।

समितिको सदस्यहरूमा स्वास्थ्य मन्त्रालयका अतिरिक्त सचिव गुणराज लोहनी, स्वास्थ्य मन्त्रीका विज्ञ सल्लाहकार रमेश ढकाल, श्रम मन्त्रालयका उपसचिव गुरुदत्त सुवेदी, सदस्य सचिवमा नारायण ढकाल रहेका छन् ।