अनुहार सौन्दर्य आधुनिक जीवनशैलीको अभिन्न हिस्सा बन्दै : डा. धर्मेन्द्र कर्ण

काठमाडौं – नेपालमा सौन्दर्य प्रतिको बढ्दो सचेतना, सजिलो तथा गैर-आक्रामक (नन-इनभेसिभ) प्रविधिको उपलब्धता र आकर्षण सँगै अनुहार सौन्दर्य क्षेत्र तीव्र गतिमा लोकप्रिय बन्दै गएको छ। राजधानीमा सुरु भएको तीन दिने थर्ड इन्टरनेशनल हेड एण्ड नेक अन्कोलोजी विथ एस्थेटिक कन्फ्रेन्स मा छाला तथा सौन्दर्य विशेषज्ञ हरूले यस्तो बताएका हुन्।

सम्मेलनमा ‘फेस एस्थेटिक्स: डर्मेटोलोजिस्ट पर्सपेक्टिभ’,  अर्थात् ‘अनुहारको सौन्दर्यशास्त्र: छाला विशेषज्ञको दृष्टिकोण’,  बिषयक कार्य पत्र प्रस्तुत गर्दै छाला रोग तथा सौन्दर्य विशेषज्ञ तथा क्यूटीस केयरका मेडिकल डाइरेक्टर प्रा. डा. धर्मेन्द्र कर्णले अनुहार सौन्दर्य भन्नाले चिकित्सा तथा सौन्दर्य प्रविधिको सहयोगले अनुहारलाई आकर्षक बनाउने प्रक्रिया भएको बताए ।

अनुहारमा भएको कुनै पनि कमजोरी वा विकृतिले व्यक्तिको उपस्थिति र मनोविज्ञानलाई प्रतिकूल रूपमा प्रभाव पार्ने जनाउँदै डा.कर्ण ले सौन्दर्य उपचारको व्यापक महत्व रहेको समेत उल्लेख गरे । यसले समग्र उपस्थिति सुधार गर्ने, आत्मविश्वास बढाउने र जीवनको गुणस्तर मा समेत ब्यापक सुधार गर्ने औल्याए ।

उनले अनुहारको लम्बाइ र चौडाइको अनुपात बारे जानकारी दिँदै भने । अनुहारको लम्बाइ यसको चौडाइको लगभग १.६१८ गुणा हुनुपर्छ । आँखा बीचको दूरी एउटा आँखाको चौडाइको १.६१८ गुणा हुनुपर्छ । यस्तै नाक र मुखको चौडाइ अन्तर्गत नाकको चौडाइ , नाकको प्वालको चौडाइको लगभग १.६१८ गुणा हुनुपर्छ, जबकि मुखको चौडाइ नाकको चौडाइको १.६१८ गुणा हुनुपर्छ।

डा. कर्णका अनुसार पछिल्लो समय नेपालभरका छाला तथा सौन्दर्य क्लिनिकहरूमा छाला पुनरुत्थान, सौन्दर्य वृद्धिका लागि सेवा लिने व्यक्तिहरूको संख्यामा उल्लेखनीय वृद्धि भएको छ। रेटिनोइडस, पेप्टाइडस, बोटक्स, डर्मल फिलर, रेटिनोइड्स, इन्जेक्टेवल, लेजर, केमिकल पील जस्ता सुरक्षित तथा प्रभावकारी प्रविधिहरूको प्रयोग बढ्दो छ।

‘अहिलेको नयाँ पुस्ता अनुहारको सौन्दर्य र आत्मविश्वास प्रति निकै सजग भएको छ,’ डा. कर्णले भने, ‘शल्यक्रिया नगरी अनुहारलाई सुन्दर, ताजा र आत्मविश्वासी देखाउने चाहना राख्नेहरूका लागि फेसियल एस्थेटिक्स एक उत्तम विकल्प हो।’

उनले पछिल्लो समय वृद्ध वर्ग मात्र नभई युवा पुस्ताले पनि छालाको सुरुवाती संरक्षणमै ध्यान दिन थालेको उल्लेख गरे। फेसबुक, टिकटक, इंस्टाग्राम लगायतका सामाजिक सञ्जाल, सेलिब्रिटी ट्रेन्ड र सौन्दर्य सेवाको सहज पहुँचले यो प्रवृत्ति झनै तीव्र बनाएको उनको भनाइ छ।

नेपालहेल्थप्रेससँगको कुराकानीमा डा. कर्णले दुई दशक अघि सम्म अनुहार सौन्दर्य का क्लिनिक र विशेषज्ञहरू गनिनसक्ने अवस्थामा रहेको स्मरण गर्दै अहिले माग सँगै छाला र सौन्दर्य विशेषज्ञ र अस्पतालहरूले अत्याधुनिक प्रविधि, उपकरण र तालिममा लगानी बढाएको बताए।