‘विश्व भरका नेपाली स्वास्थ्य विज्ञको सहभागितामा नेपाल स्वास्थ्य शिखर सम्मेलन’

काठमाडौं– सरकारले ‘नेपाल हेल्थ समिट २०२४’ आयोजना गर्ने निर्णय गरेको छ । स्वास्थ्य मन्त्री प्रदीप पौडेलले मङ्गल बार यस सम्बन्धी निर्णय गरेका हुन् ।

उक्त सम्मेलनमा स्वदेश तथा विदेशमा रहेका स्वास्थ्य क्षेत्रमा कार्यरत नेपाली विज्ञहरूको सहभागिता रहने र सुझावहरू सङ्कलन गर्ने तयारी स्वास्थ्य मन्त्रालयको रहेको छ ।

सम्मेलन मार्फत स्वास्थ्य सुधारका लागि निकट भविष्यमा समेत नीति निर्माण, योजना र आवश्यक कार्यक्रम बनाउन महत्वपूर्ण सहयोग पुग्ने विश्वास स्वास्थ्य मन्त्रालयको छ ।

स्वास्थ्य मन्त्री पौडेलले गत साउन २७ गते उनले सार्वजनिक गरेको योजना तथा प्राथमिकतामा ‘नेपाल बाहिर विभिन्न देशमा विज्ञता र अनुभव हासिल गरिरहेका स्वास्थ्य जनशक्तिको सीप र दक्षतालाई नेपालको स्वास्थ्य सेवा प्रणाली सँग आबद्ध गर्न आवश्यक प्रबन्ध गरिने’ उल्लेख छ ।

विश्व भरका नेपाली चिकित्सक, अनुसन्धान कर्ता, प्राज्ञ तथा नर्सहरूको सीप र दक्षतालाई मुलुकको स्वास्थ्य सुधारमा उपयोग गर्न आवश्यक सुझाव लिनका लागि सम्मेलन गर्न लागिएको मन्त्रालयले जनाएको छ । मन्त्रालयको अनुसार समिट मा सहभागी नेपाली विज्ञबाट प्राप्त सुझावका आधारमा स्वास्थ्य मन्त्रीको लक्ष्य अनुसार स्वास्थ्य क्षेत्रमा सुधारको कार्य योजना तयार पारिनेछ छ ।

सम्मेलनको लागि कार्यदल गठन 

स्वास्थ्य मन्त्रालयले यसका लागि आवश्यक तयारी गर्न ८ सदस्यीय कार्य दल गठन गरेको छ । डा. प्रकाश थपलियाको संयोजकत्वमा गठित कार्य दलमा स्वास्थ्य विज्ञ डा. शम्भु आचार्य सँगै पाटन स्वास्थ्य विज्ञान प्रतिष्ठानका सङ्क्रामक रोग विशेषज्ञ डा. जनक कोइराला, धुलिखेल अस्पतालका डा. विराज कर्माचार्य सदस्य छन् ।

यसैगरी, विज्ञहरूमा डा रुना झा, डा अर्चना अमात्य, वरिष्ठ जनस्वास्थ्य प्रशासक उपेन्द्र ढुङ्गाना, प्रमुख जनस्वास्थ्य प्रशासक डा. भीम प्रसाद सापकोटा र नेपाल मेडिकल काउन्सिलका प्रतिनिधिलाई आमन्त्रित सदस्य तोकिएको छ । कार्य दलको सुझावका आधारमा स्वास्थ्य मन्त्रालयले सम्मेलनको मिति तथा आवश्यक कार्य ढाँचा तय गर्ने छ ।